Blog Detail
Faith Witness of Iraq Christians
Nuncio to Iraq: Iraqi Christians give great faith witness
ഇറാക്കി ക്രൈസ്തവരുടെ ധീരമായ വിശ്വാസം പ്രശംസനീയമാണെന്ന് അവിടത്തെ വത്തിക്കാന്‍റെ സ്ഥാനപതി, ആര്‍ച്ചുബിഷപ്പ് ജോര്‍ജ്ജ് ലിംഗ്വാ ചൂണ്ടിക്കാട്ടി. വിശ്വാസം സംരക്ഷിക്കുവാന്‍ മരണമോ മൗലികവാദികളുടെ ഭീഷണിയേയോ ഭയപ്പെടാത്ത ഇറാക്കി ക്രൈസ്തവരുടെ ധീരതയെയാണ് ആഗസ്റ്റ് 10-ാം തിയതി വത്തിക്കാന്‍ റേഡിയോയുമായി നടത്തിയ ടെലിഫോണ്‍ അഭിമുഖത്തില്‍ ആര്‍ച്ചുബിഷപ്പ് ലിംഗ്വാ പ്രശംസിച്ചത്.
ഇസ്ലാംമതം സ്വീകരിക്കുകയാണെങ്കില്‍ വിമതരുടെ കൈകളില്‍ രക്ഷപ്രാപിക്കാമായിരുന്ന ക്രൈസ്തവര്‍, വിശ്വാസത്തെപ്രതി ജീവന്‍ സമര്‍പ്പിക്കുകയും, ധീരതയോടെ ഉടുതുണിയുമായി നാടും വീടും വിട്ട് ഇറങ്ങിപ്പോവുകയാണ് ചെയ്തതെന്നും ബാഗ്ദാദില്‍ വസിക്കുന്ന ആര്‍ച്ചുബിഷപ്പ് ലിംഗ്വാ പ്രസ്താവിച്ചു.
ഇസ്ലാമിക കാലിഫേറ്റ് രൂപീകരിക്കുവാനുള്ള ജീഹാദികളുടെ ശ്രമങ്ങള്‍ മനുഷ്യാവകാശത്തിന്‍റെയും മതസ്വാതന്ത്ര്യത്തിന്‍റെയും അടിസ്ഥാന അവകാശങ്ങളുടെയും ധ്വംസനമാണെന്ന് ആര്‍ച്ചുബിഷപ്പ് ലിംഗ്വാ സമര്‍ത്ഥിച്ചു.
കൂട്ടക്കുരുതിയുടെയും നാടുകടത്തലിന്‍റെയും ക്രൂരമായ പ്രക്രിയയില്‍ കൊടുംപട്ടിണിയും ജലക്ഷാമവും മൂലം വഴിയോരത്ത് തളര്‍ന്നുവീഴുകയും മരിക്കുകയും ചെയ്യുന്ന കുഞ്ഞുങ്ങളുടെയും വയോധികരുടെയും കാഴ്ച അതിദാരുണമാണെന്നും ആര്‍ച്ചുബിഷപ്പ് ലിംഗ്വാ സാക്ഷൃപ്പെടുത്തി. മൊസൂള്‍, ക്വരഗോഷ്, നിനീവേ പ്രദേശങ്ങളില്‍നിന്നും മരുപ്രദേശത്തൂടെ ഏബ്രിലിലേയ്ക്കുള്ള പലായനം ഏറെ ദുര്‍ഘടമാണെന്നും ആര്‍ച്ചുബിഷപ്പ് ലിംഗ്വാ അഭിമുഖത്തില്‍ ചൂണ്ടിക്കാട്ടി.
ഇതിനിടെ അമേരിക്കന്‍ സേന ഇസ്ലാം സുന്നി വിമതര്‍ക്കെതിരെ വ്യോമാക്രമണം തുടങ്ങിയതും, പലായനംചെയ്യുന്ന ജനങ്ങള്‍ക്ക് അത്യാവശ്യം ജലവും ഭക്ഷണസാധനങ്ങളും വിതരണംചെയ്തതും അവിടത്തെ കലുഷിതമായ അന്തരീക്ഷത്തില്‍ പ്രത്യാശയുടെ കിരണമാണെന്ന് ആര്‍ച്ചുബിഷ്പ്പ് ലിംഗ്വാ ടെലിഫോണ്‍ അഭിമുഖത്തില്‍ വത്തിക്കാന്‍ റേഡിയോയെ അറിയിച്ചു.
Remember Christians and other minorities of Iraq in daily family prayer
കുടുംബപ്രാര്‍ത്ഥനയില്‍ ഇറാക്കിലെ ജനങ്ങള്‍ക്കുവേണ്ടി പ്രത്യേകം പ്രാര്‍ത്ഥിക്കണമെന്ന് പാപ്പാ ഫ്രാന്‍സിസ് ആഹ്വാനംചെയ്തു. ആഗസ്റ്റ് 10-ാം തിയതി ഞായറാഴ്ച കണ്ണിചേര്‍ത്ത ‘ട്വിറ്റര്‍’ സന്ദേശത്തിലാണ് പീഡിപ്പിക്കപ്പെടുന്ന ഇറാക്കിലെ ക്രൈസ്തവ കുടുംബങ്ങള്‍ക്കുവേണ്ടി പ്രാര്‍ത്ഥിക്കണമെന്ന് പാപ്പാ അഭ്യര്‍ത്ഥിച്ചത്.
ഇറാക്കില്‍നിന്നു ലഭിക്കുന്ന വാര്‍ത്തകള്‍ തന്നെ ഏറെ വേദനിപ്പിക്കുന്നുണ്ടെന്ന് ട്വിറ്ററില്‍ സൂചിപ്പിച്ച പാപ്പാ, പീഡിതരും നാടുകടത്തപ്പെട്ടവരുമായ ഇറാക്കി ക്രൈസ്തവരോട് ഐക്യദാര്‍ഢ്യം പുലര്‍ത്തണമെന്നും, കഴിവുള്ളതുപോലെ അവരുടെ അടിസ്ഥാന ആവശ്യങ്ങളില്‍ സഹായിക്കണമെന്നും സംവാദകരോട് സന്ദേശത്തിലൂടെ അപേക്ഷിച്ചു. @pontifex എന്ന ഹാന്‍ഡിലില്‍ അനുദിന ജീവിതത്തിനുതകുന്ന സരോപദേശങ്ങള്‍ ‘ട്വിറ്റ്’ചെയ്യുന്ന ഡിജിറ്റല്‍ ശൃംഖലയിലെ ജനപ്രീതിയാര്‍ജ്ജിച്ച മഹത്തുക്കളായ സംവാദകരില്‍ ഒരാളാണ് പാപ്പാ ഫ്രാന്‍സിസ്.
source: radiovatican
